طورخم,کوہاٹ(نمائندہ پختونخوا نیوز) طالبان کی ایک اور کوشش ناکام، سیکیورٹی ذرائع کے مطابق طورخم اور کوہاٹ کے قریب افغان طالبان کے 8 ڈرون مار گرادیئے گئے
سیکیورٹی ذرائع کے مطابق آج صبح افغان طالبان رجیم کی جانب سے 8 ڈرونز پاکستان کی فضائی حدود میں داخل ہوئے، جنہیں افواج پاکستان کے فعال اور مستعد ائیر ڈیفنس سسٹم نے گرا دیا۔
سیکیورٹی ذرائع کا کہنا ہے کہ افواج پاکستان اور پاک فضائیہ کے شاہینوں نے بہترین اور پیشہ ورانہ کارروائی کا مظاہرہ کرتے ہوئِے افغان طالبان رجیم کی عوامی مقامات کو نشانہ بنانے کی بزدلانہ کوشش ناکام بنا دی۔
ذرائع کے مطابق ان 8 ڈرونز میں سے 4 ڈرونز طورخم بارڈ سے ملحقہ علاقوں جبکہ 4 ڈرونز کوہاٹ سے متصل بارڈ کے پہاڑی علاقوں میں گرائے گئے، یہ دراندازی افغان طالبان رجیم کی جانب سے دہشت گردوں کی براہ راست معاونت اور سرپرستی کا مزید ایک اور ثبوت ہے۔
ذرائع کے مطابق کوہاٹ کے قریب تباہ ہونے والے ڈرونز کو فضائی دفاعی نظام کے ذریعے سافٹ کِل کارروائی میں مار گرایا گیا۔
سیکیورٹی ذرائع کا کہنا ہے کہ کوہاٹ شہر کے قریب ڈرونز کی موجودگی کا سراغ ملنے کے بعد سیکیورٹی فورسز نے فوری کارروائی کی، ابتدائی معلومات کے مطابق ڈرونز کی نوعیت ابتدائی یا سادہ ساخت کی تھی۔
ذرائع کے مطابق پاکستان کی مسلح افواج کے فضائی دفاعی نظام کی جانب سے ممکنہ فضائی خطرات کے خلاف مسلسل نگرانی کی جا رہی ہے۔
سیکیورٹی ذرائع نے کہا کہ فضائی دفاعی نظام کی نگرانی اور اہلکاروں کی پیشہ ورانہ تیاری کے باعث ڈرونز کو بروقت ناکارہ بنایا گیا۔
یاد رہے کہ سیکیورٹی ذرائع کے مطابق کوہاٹ کے قریب افغان طالبان کے 2 ڈرون مار گرائے گئے، ڈرون کوہاٹ شہر سے تقریباً 7 کلومیٹر دور تھے۔
گزشتہ روز سے افواج پاکستان نے کرم سیکٹر میں افغان طالبان رجیم کے متعدد مورچوں اور ٹھکانوں کو اشتعال انگیز فائرنگ کےجواب میں تباہ بھی کیا تھا، افواج پاکستان ہمہ وقت پاکستان اور عوام کے دفاع کیلئے تیار ہیں۔
سیکورٹی ذرائع کے مطابق ناجائز افغان طالبان ریجیم کے ڈرون حملوں پر پاک فضائیہ کے فعال دفاعی نظام نے برقت کارروائی کی اور انہیں ڈیٹیکٹ کیا، پاک افغان بارڈر پر پاک فضائیہ کے زیرِ نگرانی تشخیصی اور دفاعی نظام ہمہ وقت تیار اور فعال ہے۔
اس حوالے سے سیکیورٹی ذرائع نے مزید بتایا کہ حالیہ واقعے اس بات کی مزید تصدیق کرتے ہیں کہ افواج پاکستان افغان طالبان رجیم کی ہر زمینی، ہوائی اور دہشت گردانہ دراندازی کو ناکام بنانے کا مکمل عزم اور صلاحیت رکھتی ہیں۔
سیکیورٹی ذرائع نے بتایا کہ تباہ شدہ ڈرونز کا ملبہ تحویل میں لیا جا رہا ہے
