تخت بھائی (حیات اللہ اختر) تخت بھائی کی حدود میں سری بہلول پولیس چوکی پر نامعلوم دہشت گرد کا دستی بم حملہ پولیس کی بروقت جوابی کارروائی سے ناکام بنا دیا گیا، جس کے نتیجے میں حملہ آور ہلاک جبکہ 3 پولیس اہلکار معمولی زخمی ہوگئے۔
پولیس کے مطابق واقعہ 14 ستمبر کی شب تقریباً 11 بج کر 55 منٹ پر پیش آیا، جب نامعلوم دہشت گرد نے پولیس چوکی پر دستی بم سے حملہ کیا۔ چوکی پر تعینات سنتری نے بروقت اور مؤثر جوابی کارروائی کرتے ہوئے حملہ آور کو ہلاک کردیا۔ کارروائی کے دوران حملہ آور کے ہاتھ میں موجود دوسرا دستی بم بھی موقع پر ہی پھٹ گیا۔
واقعے میں چوکی کے اندر ڈیوٹی پر موجود 3 پولیس اہلکار معمولی زخمی ہوئے، جنہیں فوری طور پر ہسپتال منتقل کردیا گیا۔ اطلاع ملتے ہی قائم مقام ڈی پی او مردان ماریہ مصطفیٰ PSP دیگر پولیس افسران کے ہمراہ موقع پر پہنچیں اور صورتحال کا جائزہ لیا۔
بعدازاں قائم مقام ڈی پی او اور مردان پولیس کے دیگر افسران نے ہسپتال پہنچ کر زخمی اہلکاروں کی عیادت کی اور ان کی خیریت دریافت کی۔ انہوں نے متعلقہ حکام کو زخمی اہلکاروں کو بہترین طبی سہولیات فراہم کرنے اور علاج معالجے میں ہر ممکن تعاون یقینی بنانے کی ہدایت کی۔
واقعے کے بعد علاقے میں سرچ اور نگرانی کا عمل جاری ہے جبکہ پولیس نے حملے کے حوالے سے مزید تفتیش شروع کردی ہے۔
ی۔
